Bautista, Lualhati. Desaparesidos. Mandaluyong City: Anvil Publishing, Inc., 2018.
desaparesidos (pangngalan) – katawagan sa mga taong nawawala, lalo na noong panahon ng Batas Militar.
“Maganda ang pamumuhay noong panahon ng Batas Militar, payapa ang lipunan dahil disiplinado ang mga tao.” Ito ang mga katagang tipikal na maririnig sa mga taong bilib sa uri ng pamamahala ni Ferdinand Marcos, uri ng pamamahala na patuloy din nilang hinahangaan sa kasalukuyang pangulong Rodrigo Duterte. Ngunit hindi lingid sa kaalaman ng marami, na kung kakaunti man ang opisyal na tala ng mga krimen na ginawa ng mga mamamayan noong panahon ng Batas Militar, ito ay dahil sinolo ng pamahalaan ang kapangyarihan na gumawa ng krimen (huwag nang banggitin pa ang pagmonopolyo nito sa mga pahayagan na instrumento sana sa pagpapakalat ng balita ukol sa mga krimen ng pamahalaan). Sa likod ng mga dambuhalang gusali, kalsada at iba pang imprastraktura – na ipinagmamalaki ng mga loyalista ni Marcos – ay ang testimonya ng libo-libong biktima ng paglabag sa karapatang pantao. Mga taong hanggang sa kasalukuyan ay hindi pa rin nakakamit ang katarungan, habang ang pamilya at mga dating kasabwat ng diktador ay patuloy na nakaluklok sa kapangyarihan.
Ang Desaparesidos ni Lualhati Bautista ay isang matayog na monumento na
pinipilit tayong huwag makalimot sa mga karahasan ng Batas Militar. Sa
partikular, isa itong panandang bato sa mapangwasak na bisa ng diktadurang
Marcos sa pamilyang Pilipino. Isa sa pinakamakabagbag damdamin sa mga katha ni
Bautista, ang nobela ay madilim na paglalarawan sa malalim na sugat na iniwan
ng Batas Militar sa pamilya ng mga biktima nito, na iniinda pa rin ng mga ito
ilang dekada matapos mapabagsak ang diktadura.
Tulad ng Dekada ’70 at Bata, Bata…Pano
Ka Ginawa? isa ring matapang na ina ang protagonista ng Desaparesidos, sa katauhan ni Anna.
Ngunit lagpas ang pakikibaka ni Anna kapwa sa antas ng pakikisangkot nina
Amanda (na nasa proseso ng pagkamulat) at Lea (na isang manggagawang
panlipunan). Tulad ng ibang mga kabataan noong panahon ng Batas Militar na
naniniwala sa radikal na metodo sa pagbabagong panlipunan, umanib si Anna sa
armadong kilusan laban sa diktador. Yamang walang sinuman sa kilusan ang
gumagamit ng kanilang tunay na pangalan, kilala siya ng mga kasama sa pangalang
Ka Lei. Habang nasa kilusan ay napaibig siya kay Nonong, at nagbunga ang
kanilang pagmamahalan ng isang sanggol na pinangalanan nilang Malaya. Ngunit
hindi pa nagtatagal mula nang ipanganak niya si Malaya ay nahuli si Nonong ng
mga militar, pinahirapan, at nang hindi mapilit na magturo ay pinatay. Tulad ng
nakasanayan ng mga militar, itinanghal nila sa publiko ang bangkay nito upang
hindi tularan ng mga tao, at pinalabas na napatay nila sa isang engkwentro.
Yamang lubhang mapanganib ang
kanyang gampanin sa kilusan, naisip ni Anna na kailangan niya munang iwan si
Malaya sa isang mas ligtas na lugar. Nagmagandang-loob ang isa nilang kasama na
si Jinky, na ipaalaga si Malaya sa asawa nito na si Karla. Nagdadalang-tao noon
si Karla, at nagkataong Malaya rin ang balak ipangalan sa magiging anak nito.
Nakapisan noon si Karla sa mga magulang ni Roy, na isa ring kasama. Nakikiisa
ang mga magulang ni Roy sa ipinaglalaban ng anak, at bukas ito sa mga kasamahan
ni Roy na dinadala niya rito. Kaya naman, naging mainit din ang pagtanggap nila
sa sanggol na si Malaya.
Ngunit ang lugar na iniisip nilang
malayo sa panganib ay hindi rin pala ligtas. Isang araw ay napadpad ang mga
sundalo sa baryo na kinalalagyan nina Karla, dahil mayroong nakapagturo na sa
lugar na ito nakatira si Roy. Bago pa man makarating ang mga sundalo sa
kanilang baryo, natunugan na ng ama ni Roy na si Mang Manuel ang napipintong
pagpunta ng mga ito. Kaya naman agad niyang inilikas si Karla at Malaya sa
ibang baryo, sa pangangalaga ng isang kaibigan na nagngangalang Mang Kardo.
Bukod sa kaligtasan nina Karla, para rin ito sa seguridad ng pamilya ni Roy,
dahil kapag nalaman ng militar na mayroon silang kinukupkop na dayo sa baryo ay
tiyak na pare-pareho silang mapapahamak. Subalit sa kabila nito ay hindi pa rin
sila nakaligtas mula sa kabuktutan ng mga sundalo. Noong malaman ng mga ito na
si Mang Manuel ang ama ni Roy, pinilit nila itong magsalita ukol sa
kinaroroonan ng anak. Nang hindi magsalita si Mang Manuel, pinatay nila ito at
pinagbabaril ang buong pamilya ni Roy, ang kanyang nanay at lahat ng kanyang
mga kapatid, pati ang bunso nilang si Nene na anim na taon pa lamang.
Labis ang pagkagimbal at poot ni
Roy nang mabalitaan ang nangyari sa kanyang pamilya. Subalit sa gitna ng
pagdadalamhati ay alam niyang kailangang magpatuloy sa pakikibaka, lalo na
dahil ito lamang ang paraan upang maipaghiganti ang kanyang pamilya. Tulad ng
pakikidalamhati ni Roy kay Anna noong mamatay si Nonong, sa pagkakataong ito ay
si Anna naman ang nakikihati sa pighati ni Roy. Ngunit liban sa pakikidalamhati
kay Roy, labis na nababalisa si Anna sa kaligtasan ng kanyang anak. Hindi nila
alam kung kasama bang pinatay ng mga sundalo si Karla at Malaya sa tahanan ni
Mang Manuel, o kung nailikas sila bago maganap ang pagpatay.
Sa kagustuhang mahanap ang kanyang
anak, nagpaalam si Anna sa mga kasama na pansamantala niya munang iiwan ang
kilusan. Ganito rin ang pagpapaalam na ginawa ni Jinky, na sumama kay Anna
upang hanapin ang kanyang asawang si Karla. Ngunit wala silang kamalay-malay na
ang kanila palang napagplanuhang destinasyon – tahanan ng isa ring kasama na
titirhan sana nila habang isinasagawa ang paghahanap – ay nakubkob na ng
militar. Pinahirapan ng mga sundalo ang kasamahang ito, at dahil sa labis na
sakit ay inamin nito na may dalawa siyang kasamahan na napipintong dumating.
Inabangan sila ng mga sundalo, at nang madatnan ni Anna at Jinky ang tahanang
ito ay agad silang dinakip. Ginamitan nila ng samu’t saring tortyur si Anna at
ipinagahasa sa iba’t ibang sundalo. Gayunpaman, sa gitna ng mga pananakit at
pambubusabos ng militar ay hindi nagbigay ng anumang impormasyon si Anna ukol
sa kilusan. Matapos mapagtanto na hindi talaga magsasalita si Anna kahit ano
ang kanilang gawin, inihagis na nila ito sa kulungan.
Sa kabilang banda, sa gitna ng
pangtotortyur kay Jinky ay napilitan itong magsalita. Itinuro nito ang
pinagtataguan ng kanilang mga kasamahan. Nagdulot ito sa pagkahuli ng maraming
kasama sa kilusan, tulad ni Roy. Nakita pa nilang kasama si Roy ng mga sundalo
nang kubkubin ng mga ito ang kanilang pinagtataguan. Humihingi ito ng tawad sa
kanila at sinabing hindi na niya kinaya ang pahirap ng mga sundalo. Galit na
galit si Roy at nagawa niyang duraan si Jinky sa mukha bago siya tuluyang
binitbit ng mga sundalo. Labis ang pahirap na dinanas ni Roy sa kamay ng mga
militar. Pinaghahampas siya ng kadena, pinagsusuntok, at kinuryente ang kanyang
ari. Ngunit mas malala ang kanyang nararamdaman kapag naaalala niya ang utos sa
kanya na bugbugin ang kanyang kasama at matalik na kaibigang si Lito. Tinutukan
ng baril si Lito, at sinabi kay Roy na kapag hindi niya ito ginulpi ay
papatayin nila ito, kaya napilitan siyang bugbugin si Lito hanggang sa maging
duguan na ito. Tulad ni Anna, hindi rin nagsalita si Roy sa kabila ng mga
pasakit na ito. Nang matapos na siyang pahirapan, ipiniit na rin nila si Roy,
at sa kulungan ay nakasama niya si Anna.
Hindi nagtagal si Roy sa piitan,
dahil nagawa niyang makatakas sa pamamagitan ng pakikipagkaibigan niya sa isang
sarhentong nagbabantay sa kanila. Agad na bumalik si Roy sa kilusan matapos ng
pagtakas niyang ito. Ang pinakaunang tungkuling ibinigay kay Roy matapos ang
kanyang pagbabalik ay ang pagkitil sa buhay ni Jinky, bilang kabayaran sa
pagtataksil nito sa kilusan. Pagkatapos ng ginawang pagtuturo noon ni Jinky sa
kanyang mga kasamahan, pinalaya agad siya ng militar. Minabuti nitong bumalik
sa kanyang probinsya at tumira sa tahanan ng kanyang mga magulang. Nalaman ng
kilusan ang kinalalagyan ni Jinky, at matapos nila itong manmanan at makabisado
ang kanyang mga ruta, ipinag-utos kina Roy na isagawa na ang pagpatay. Si Roy
mismo ang kumalabit ng gatilyo na nagpabulagta kay Jinky sa gitna ng isang
mataong palengke ng bayan nito.
Samantala, inabot ng matagal ang
pagkakalaya ni Anna. Isa si Anna sa napiling palayain noong matuwa ang judge
advocate general sa kanyang nakamit na promosyon at nagpasyang magpalaya ng
tatlong bilanggo. Tulad ni Roy, agad ding bumalik sa kilusan si Anna. Kasabay
din nito ang pagpapasya niyang ipagpatuloy ang paghanap sa nawawalang anak.
Nagmagandang-loob si Roy na samahan si Anna sa kanyang paghahanap. Sa katagalan
ng kanilang pagiging magkasama sa pagtungo sa iba’t ibang lugar upang mahanap
si Malaya, lalo pang nagkalapit ang kanilang loob hanggang sa nagpasya silang
magpakasal. Nagbunga ng isang sanggol ang kanilang pagmamahalan, na
pinangalanan nilang Lorena.
Simula nilang napagtanto ang
kalaliman ng sugat na iniwan sa kanila ng Batas Militar noong unang gabi ng
kanilang pagniniig. Sa gitna ng kanilang pagtatalik ay napahinto sila dahil
habang ginagawa nila ito ay bumabalik sa alaala nila ang mga pahirap na dinanas
nila sa kamay ng mga sundalo – ang panggagahasa kay Anna at pagkuryente sa ari
ni Roy. Napahinto sila sa pagniniig at humingi ng tawad sa isa’t isa.
Lumipas ang dalawampung taon
matapos ang pagkawala ni Malaya ay hindi pa rin nila ito natatagpuan.
Dalawampung taong paghahanap, ngunit walang anumang bakas ni Malaya at Karla
ang kanilang natagpuan. Dalawampung taon na ang lumipas ngunit madalas pa rin
na sa kalagitnaan ng gabi ay bigla na lamang babangungutin si Anna o si Roy
ukol sa mga ginawa sa kanila ng militar, magsisisigaw, at gigisingin ng asawa.
Mga gabing bigla na lamang iiyak si Anna kay Roy, dahil maaalala ang nawawalang
anak, o ang panggagahasa sa kanya ng mga sundalo. Mga gabing bigla na lamang
iiyak si Roy kay Anna, dahil maaalala niya ang utos sa kanya na bugbugin si
Lito, o ang pagmasaker sa buong pamilya niya. Gabi-gabi bago matulog ay
paulit-ulit nilang tinitingnan kung maayos ba ang pagkakasusi ng kanilang
pinto, kung matibay ba ang rehas ng kanilang mga bintana, papasok sa kwarto ni
Lorena upang masigurado na naroon pa ang kanilang anak at walang sinumang
kumuha rito.
Lalo pang naging madalas ang mga
bangungot nila, ang pagbalik ng mapapait na alaala dahil sa trabahong pinasok
nila. Pagkalipas ang dalawampung taon matapos ang mga mapapait nilang
karanasan, nagpasya ang mga biktima ng Batas Militar na magsampa ng kaso sa
pamilyang Marcos sa mga paglabag nito sa karapatang pantao. Sumali si Anna at
Roy sa organisasyong mangunguna sa pagsasagawa nito. Kasama sa proseso ng
paghahanda sa kasuhang ito ang paglikom ng sampung libong testimonya mula sa
mga biktima ng Batas Militar. Higit sa bayad-pinsala na maaari nilang matanggap
kung sakaling manalo sila sa kasuhan, mas hinahangad ng mga biktimang nagbigay
ng testimonya na makatanggap sila ng katarungan. Liban sa paglikom ng mga
testimonya, nagdaraos ang organisasyon ng mga kumperensya at naglalathala ng
mga aklat na may kinalaman sa mga pang-aabuso ng diktadurang Marcos.
Nagpapasinaya rin sila ng mga pagtitipon na ang layunin ay alalahanin ang mga
pinatay noong Batas Militar. Sa isang kumperensyang ginanap, ilan sina Anna at
Roy sa naatasang isalaysay ang kanilang karanasan. Naging mahirap para sa
kanila na gawin ito, lalo na dahil pinasariwa na naman nito ang mga lumang
sugat na hanggang sa panahong iyon ay hindi pa rin magaling.
Maging sa kanilang anak na si
Lorena ay naipamana nila ang sugat na iniwan sa kanila ng Batas Militar. Tulad
ng maraming mga bata na ang mga magulang ay kasapi sa kilusan, lumaki si Lorena
na palipat-lipat ng tahanan. Iniiwan siya kung saan-saan ng kanyang mga
magulang para sa kanyang kaligtasan, habang ginagampanan nila ang mga tungkulin
sa kilusan. Nasanay siya na paminsan-minsan lamang siya dadalawin ng kanyang
magulang, at mawawala na naman nang matagal ang mga ito. Iba’t ibang mga bata
ang nakakasama niya sa tahanan ng iba’t ibang kasama sa kilusan ng kanyang mga
magulang, mga batang anak din ng mga rebolusyonaryo. Isa sa mga batang ito si
Eman, na kalaunan ay naging kasintahan niya.
Kalaunan, sinabi ng mga magulang ni
Lorena na sama-sama na silang titira sa iisang bahay, dahil may pormal nang
hanapbuhay ang dalawa bilang mga opisyal sa organisasyong maghahanda ng kaso
laban sa pamilyang Marcos. Ngunit kahit sa mga panahong magkakasama na sila sa
iisang bubong at namumuhay tulad ng isang pangkaraniwang pamilya, nakararamdam
pa rin si Lorena ng pangungulila, ng pagkawala. Naiinis siya sa paulit-ulit na pagsigurado
ng kanyang mga magulang kung matibay ba ang pagkakasusi ng pinto at ang mga
rehas ng bintana, at kung naroon ba siya sa kanyang silid. May mga pagkakataon
na kapag naririnig niyang may umiiyak sa kwarto ng kanyang mga magulang ay
palihim siyang sisilip dito. Makikita niyang niyayakap at pinatatahan ng
kanyang tatay ang kanyang nanay, o ng kanyang nanay ang kanyang tatay. Nais
niyang pumasok at makiyakap din, pero mayroon siyang pakiramdam na hindi siya
kabilang natutunghayan niyang pagmamahalan. Labis din ang pagseselos niya kay
Malaya, sa nakikita niyang sobrang pagsisikap ng kanyang ina upang hanapin ito.
Si Malaya ang nawawala, at siya ang narito, ngunit pakiramdam niya ay siya ang
nawawala sa pamilyang ito, na siya ang desaparesido.
Sa patuloy nilang paghanap ng bakas
na maaaring makatulong sa kanila upang matagpuan si Malaya, nalaman ni Anna ang
tahanan ng mga magulang ni Jinky. Noon ay alam na ni Anna na ang kilusan ang
nagpapatay kay Jinky. Nabalitaan niya na ito mula pa man noong siya’y nakakulong.
Ngunit inilihim sa kanya ni Roy na siya mismo ang pumatay kay Jinky. Pagdating
nila sa bahay ng mga magulang nito, ipinakita sa kanila ng nanay ni Jinky ang
mga lumang larawan nito, upang masigurado kung ang Jinky ba na kanilang kilala
ay ang anak talaga nito, na ang tunay na pangalan ay Fernando Magdangal.
Matapos makita ang mga larawan ni Fernando Magdangal ay sinigurado nina Anna na
ito talaga ang kanilang tinutukoy na Jinky. Isinalaysay sa kanila ng nanay ni
Jinky kung paano ito namatay. Nang magtanong si Anna kung may balita ba ito
ukol sa asawa ni Jinky na si Karla, tumugon ang matanda na isang beses lamang
itong dumalaw sa kanilang tahanan, noong matapos mamatay si Jinky. Nabuhayan ng
loob si Anna, dahil isa itong patunay na hindi kasamang namatay si Karla at ang
kanyang anak sa tahanan ng pamilya ni Roy. Idinagdag pa ng nanay ni Jinky na
noong tumungo si Karla sa kanila ay may kalong-kalong itong batang babae na ang
pakilala niya ay anak nila ni Jinky. Sinabi raw sa kanya ni Karla na tutungo na
silang magnanay sa Canada, dahil pinepetisyon siya ng kanyang magulang doon.
Nagtatalong saya, pagkalito at galit ang nararamdaman ni Anna. Saya dahil
tumaas ang pag-asa niyang buhay ang kanyang anak. Pagkalito dahil hindi siya
sigurado kung ang bata bang sinama ni Karla sa nanay ni Jinky at dinala nito sa
Canada ay ang anak ba niya o anak ni Karla (na parehong Malaya ang pangalan).
Galit dahil kung talagang anak niya ang sinama ni Karla sa Canada, bakit niya
ito sinama, bakit hindi man lang niya tinangkang hanapin si Anna upang ibalik
ang anak nito, o magpadala man lang ng liham sa kahit na sinong kasama sa
kilusan upang sabihin na buhay pa ang kanyang anak.
Habang pabalik na sila sa
Kamaynilaan ay nakaramdam ng pagdududa si Anna kay Roy. Bakit parang kabisado
nito ang mga pasikot-sikot sa lugar ng probinsya ni Jinky gayong wala siyang
maalalang nabigyan na ito ng kilusan ng tungkulin dito? Matapos ang makailang
ulit na pagtatanong ni Anna ay napilitan nang magtapat ng katotohanan si Roy,
na siya ang naatasang pumatay kay Jinky. Sinabi niyang kolektibong desisyon
ito, at nanggaling ang utos sa itaas. Labis na nagalit si Anna na ilang taong
itinago ni Roy ang katotohanan, gayong si Jinky lang ang tanging bakas na
magagamit nila upang matagpuan nila si Karla at si Malaya. Ngunit nagawa rin
niyang huminahon kalaunan at patawarin ang kanyang asawa.
Sa isang di-inaasahang pagkakataon,
habang abala si Anna sa pag-aasikaso ng mga papeles na naglalaman ng testimonya
ng mga biktima ng Batas Militar, may isang dalagang tumungo sa kanilang
opisina. Sinabi nito na nais niyang magbigay ng testimonya ukol sa kanyang
tatay na sinasabing pinatay ng mga kasamahan nito sa kilusan dahil sa
pagtataksil. Nais niyang paimbestigahan ito dahil gusto niyang linisin ang pangalan
ng kanyang tatay, na patunayang ang mga sundalo ang talagang pumatay dito.
Dagdag pa niya, galing silang magnanay sa Canada, at siya ang magbibigay ng
testimonya dahil ayaw nang ungkatin pa ng kanyang ina ang mga nangyari. Gusto
na raw umano nitong maging payapa ang kanilang buhay at kalimutan na ang
nakaraan. Labis ang panlalamig na naramdaman ni Anna nang marinig niya ang mga
paliwanag na ito ng dalaga. Tuluyan na siyang nahimatay noong sabihin ng dalaga
na ang pangalan niya’y Malaya Magdangal.
Hindi agad sinabi ni Anna ang
dahilan kay Malaya ng kanyang pagkahimatay. Ang binanggit lang niya kay Malaya
ay kasama niya dati sa kilusan si Jinky at Karla. Tinanong ni Anna kung saan
sila nakatira, ngunit hindi nito sinabi na ang dahilan ay nais niyang itanong
kay Karla kung si Malaya Magdangal ba ay anak niya o anak ni Karla. Nang
dalawin na ni Anna at Roy si Karla, nagsinungaling ito. Sinabi nitong si Malaya
Magdangal ay kanyang anak, at ang anak ni Anna ay namatay.
Isinalaysay niya kung paanong
itinakas siya ni Mang Manuel mula sa tahanan nito bago dumating ang mga
sundalo, patungo sa tahanan ng kaibigan nitong si Mang Kardo. Sabi niya, isang
gabi ay nag-alala si Aling Julia dahil sobrang natagalan sa pag-uwi si Mang
Kardo. Nagtataka sila dahil nagkakagulo ang mga tao. Naisip nilang paparating
na ang mga sundalo sa kanilang baryo. Lumabas si Aling Julia upang hanapin si
Mang Kardo ngunit nagkasalisi sila. Pagdating ni Mang Kardo, sinabi nito kay
Karla na kailangan na nilang makalayo ni Malaya dahil tama nga ang hinala nila
na sila naman ang sunod na pupuntahan ng mga sundalo. Agad na lumabas si Mang
Kardo upang hanapin ang asawa nito kaya naman naiwan sina Karla. Kahit na hirap
dahil sa kanyang pagdadalang-ta0, tumakbo si Karla bitbit si Malaya upang makaligtas
sila. Nang hindi na niya makaya ang pagtakbo, tumungo siya sa isang puno upang
hindi siya maipit ng mga tao. At doon ay unti-unti nang humihilab ang kanyang
tiyan tanda na manganganak na siya. Sinabi niya kina Anna na habang nasa ganito
siyang kalagayan ay nabitawan niya si Malaya, gumapang ito palayo sa kanya at
aksidente itong natapakan ng mga taong nagtatakbuhan, na siyang kinamatay nito.
Pagkatapos ay nadatnan umano siya
ng mga militar. Ngunit sa halip na pahirapan siya ay sinagip pa ng mga ito ang
buhay nilang mag ina at dinala sila sa ospital. Aniya, nakakaramdam siya
hanggang sa pagkakataong iyon ng kabalintunaan, kung bakit ang mga sarili niya
pang kasamahan ang pumatay sa kanyang asawa, samantalang ang mga kalaban nilang
militar ang nagligtas sa kanyang buhay. Matapos isalaysay ni Karla ang lahat ng
ito, nagdadalamhating umalis sina Anna at umuwi sa kanilang tahanan.
Samantala, tuloy-tuloy pa rin si
Lorena sa pagdaramdam at pagpapakita ng magaspang na ugali sa harap ng kanyang
mga magulang. Ang pagkalumbay ni Lorena ay nadagdagan pa ng pag-aalala dahil sa
nasasaksihan niyang paglalim ng ideyalismo ni Eman ukol sa pagbabagong
panlipunan. Habang tumatagal, ang mga sinasabi nito ay nagiging katulad na ng
mga sinasabi ng kanyang mga magulang ukol sa pang-aapi at pangangailangan na
lumaban para sa bayan. Lumalahok ito sa mga kilos-protesta at iba pang
aktibidad na may kinalaman sa pagsusulong ng katarungan. Nang isang beses ay
magsabi si Eman na isang linggo siyang mawawala para sa isang seminar, kung
saan lulubog sila at makikipamuhay sa mga magsasaka, nagbulalas na si Lorena ng
kanyang galit. Sinabi niya na hindi natuto si Eman mula sa karanasan ng
magulang nito, na wala namang napala sa ipinaglalaban nila. Lumang tugtugin na
umano ang rebolusyon, dahil matagal nang lumalaban ang kanilang mga magulang
ngunit nananatili pa rin namang naghihirap ang mga Pilipino. Mahal pa rin ang
galunggong at wala pa ring makain ang mga nagtatanim ng bigas. Idinagdag pa
niya na sa halip na makabuti ay lalo pang nagdudulot ng mga negatibong epekto
ang paglaban, tulad na lang ng pagpapabaya nila sa kanilang pamilya. Aniya,
“Walang nagbago Eman; naulila lang tayo . . . Walang nalikha ang mga magulang
natin… kundi isang lipunan ng mga desaparesido!” (p.172).
Dahil sa eksenang ito, bago umalis
si Eman tungo sa lugar na paggaganapan ng seminar ay isinalaysay niya kay Roy
ang mga sinabi ni Lorena, at binilinan itong alalayan ang anak. Habang
nakatambay mag-isa si Lorena sa kainang laging pinagdadalhan sa kanya ni Eman,
nagulat siya na ang lalakeng biglang umupo sa kanyang tabi ay ang kanyang ama.
Unang beses silang nagkaroon ng marubdob na pag-uusap. Inilabas niya ang
kanyang mga hinanakit sa kanyang ama. Ito rin ang unang pagkakataon na umiyak
sa harap niya ang kanyang ama, kitang kita niya ang pagdurusang pinagdaanan at
patuloy na pinagdaraanan nito. Nang kutyain ni Lorena ang rebolusyon, nagpaliwanag
ang kanyang ama na “Totoong magal pa rin ang galunggong at wala pa ring makain
ang nagtatanim ng bigas… At iyon mismo ang dahilan kaya patuloy ang pagtatanim
ng mga pangarap… patuloy ang pagsusulong ng mga adhikain” (p.178). Humingi rin
ng tawad si Roy sa mga pagkukulang nila kay Lorena, dahil aniya, hindi pa rin
sila ganap na makabalik, kahit na sa kanilang mga sarili. Pagkalipas ng ilang
araw, sinundan naman ito ng pagkausap sa kanya ng kanyang ina. Humingi rin ito
ng tawad sa kanya, at ipinaunawa na mahal siya nito. Kahit pa nakikita niyang
todo ang paghahanap ng kanyang ina kay Malaya, hindi ibig sabihin nito ay mas
mahal niya iyon kaysa sa kanya. Pantay umano ang kanyang pagmamahal sa kanilang
magkapatid dahil sa payak na katotohanang pareho niya silang mga anak. Simula
nito ay unti-unti nang bumukas ang loob ni Lorena sa kanyang mga magulang. Nang
makabalik si Eman at pinuntahan siya nito, agad niya itong niyakap, at sa
pagkakataong ito ay mas nauunawaan na niya si Eman, tulad ng pagkaunawa na niya
sa kanyang mga magulang.
Nagpasya si Roy na tumungo kay
Karla upang ipagtapat dito ang buong katotohanan ukol sa pagpatay niya kay
Jinky. Ikinumpisal niya kay Karla, na kay Jinky niya isinisi ang lahat, pati
ang kanyang kahinaan, ang kanyang kaduwagan noong bugbugin niya si Lito
(sapagkat sa likod ng isip niya ay sumasagi ang kaisipan na baka kaya niya
binubog si Lito ay hindi dahil natatakot siyang patayin ito ng mga sundalo
kundi dahil natatakot siya para sa sarili niyang buhay). Sa gitna ng pagtangis
ni Roy sa kanyang harapan ay nagawa niya ihilig sa kanyang dibdib, ang lalakeng
pumatay sa kanyang asawa.
Dahil sa pagtatapat sa kanya ni
Roy, naramdaman ni Karla na ang pinakamainam gawin ay ipagtapat ang totoo kay
Malaya. Isinalaysay nito ang tunay na naganap, kung paanong noong humilab ang
kanyang tiyan sa tabi ng puno ay ipinanganak niya na kulang sa buwan ang
sanggol na agad ding namatay; na sa gitna ng panganganak na ito ay hindi niya
binitawan si Malaya; kung paanong dinala siya sa ospital at sinalinan ng dugo
ng isang sundalo, habang nasa kanyang tabi si Malaya. Agad na pinuntahan ni
Malaya si Anna sa opisina noong nag-aasikaso ito ng mga dokumento. Kamuntikan
na namang mahimatay si Anna nang sabihin sa kanya ni Malaya na ayon kay Karla,
siya nga ang tunay na anak nito. Pinakiusapan niya si Malaya na patawarin si
Karla, dahil naging mabuti naman ito umanong nanay sa kanya. Habang nasa estado
ng pagkagulat si Anna kung totoo ba talaga ang nangyayari sa harap niya ngayon,
niyakap siya ng mahigpit ni Malaya. At sa wakas ay ipinakilala na si Lorena at
Malaya sa isa’t isa, na nagdulot sa kanila ng pagkakumpleto; dalawang
magkapatid na pinaghiwalay ng mga pagkakataon, ngunit magkasukob sa iisang
karanasan ng pagkawala at muling pagbabalik.
Ang makirot na kwento ng nobelang
ito ni Lualhati Bautista ay monumento ng malalim na sugat na inilatay ng
diktadura sa lipunang Pilipino, na tagos hanggang sa kasuluksulukan ng
buhay-pamilya ng mga biktima. Ngunit ito ay monumento rin ng patuloy na
pagpapakatatag at pakikibaka para sa pagkamit ng katarungan. Marami ang
nagsasabi na mag-move on na tayo
bilang isang bayan sa mga sakit na dinulot ng Batas Militar. Kalimutan na raw
natin ito upang mas mapagtuunan ng pansin ang kasalukuyan. Ngunit hindi nila
nauunawaan, na tulad ng aral na iniiwan sa atin ng nobelang Desaparesidos, ang pakikibaka tungo sa
katarungan ay siya ring daan tungo sa paggaling, dahil isa sa mga sangkap na
kinakailangan sa paghilom ng sugat ay ang pagkamit ng katotohanan at
katarungan.
No comments:
Post a Comment